ممرضة دمرت حياتى ٣
فصك حكيم على أسنانه بغيظ قائلا ..يا آنسة اظن ده مكان للتعليم وبس ، مش لحاجة تانية .
لولو …خلاص متبقاش حمقى كده ، وانا خلاص مش هعطلك وهسيبك تذاكر .
ثم أمسكت برأسها متأوهة …اااااه .
حكيم بفزع …ايه مالك فى ايه ؟
لولو …مش عرفة ،مرة واحدة صداع جامد ومش عارفه حاسه دايخة شوية كده ، ثم مالت برأسها على كتفه.
وهنا التقطت صديقتها الصورة سريعا ، قبل أن يقوم حكيم برد فعل على تصرفها هذا .
حكيم بتذمر وحرج….ما يصحش كده يا آنسة ، احنا فى الجامعة ، مش فى الشارع .
وتقدرى تتصلى بأى صديقة عندك ،تكون معاكى وتوديكى لدكتور تتطمنى على حالتك افضل .
فاعتدلت لولو قائلة ..معلش ، سورى كان غصبا عنى .
انا فعلا مش هقدر أكمل اليوم وهروح ،عشان تعبانة .
حكيم ..طيب شوفى حد من صحباتك ،متروحيش لوحدك .
لولو …لا متخافش ، انا بقيت احسن شوية ، بس محتاجة انام شوية مش اكتر .
يلا سلام .
حكيم …سلام .
ثم حدث نفسه …بنت غريبة اوى ، ربنا يهديها .
معندهاش ذرة حياء ، يلا المهم بعدت عن وشى اليوم ده .
ثم اسرعت لولو إلى صديقتها قائلة بضحك ..ها سبع ولا ضبع؟
صديقتها حسناء …سبع طبعا ،شوفى بنفسك .
فرأت لولو الصورة ، فاعجبتها قائلة …هو ده .
اه صراحة مقدرتش عليه ، بس عشان البرستيج قدام طلعت .
هبعتله بقا ،واقفل على الموضوع ده .
انا مش ناقصة تقل دم الواد حكيم ده تانى .
انا بحب الناس المفرفشة
حسناء …على قولك ،ده واد رخم اصلا .
وصلت رسالة إلى طلعت فنظر فى هاتفه ، فوجدها من لولو فابتسم بمكر .
وفتح الصور ، فرأى الكلمات وايضا الصورة .
فقال بسعادة ….عفارم عليكى يا لولو .
هو ده اللى انا كنت عايزه بالظبط .
ثم همس …ياريت بقا تحس بقلبى انا وتنساه ، لانى فعلا حبتها حب حقيقى ،مش لعب زى ما كنت فاكر اول مرة شوفتها .
وفعلا بتمناها زوجة ليا ، مش هلاقى زيها فى اخلاقها وجمالها الهادى الطبيعى ،وابتسامتها اللى كل ما أشوفها ، بتسعدنى اليوم كله .
ومبقتش قادر يعنى يوم من غير ما اشوفها أو اتكلم معاها .
بس هى مش مديانى فرصة خالص .
عشان متعلقة بحتة طالب لسه ، ميستهلهاش .
واهو شاف غيرها ،وهى لسه عايشة فى الوهم .
او هو معيشها فى الوهم .
ثم ردد ….لما اروح احاول معاها تانى ، واول لما تجيب سيرته ، اوريها الصورة عشان تعرف حقيقته كويس .
وتبطل تبصله كأن مفيش ذيه فى الدنيا .
فتقدم منها أثناء انشغالها بتعقيم بعض الأدوات الطبيبة .
طلعت بحب …حنين تعرفى انك بتوحشينى ، حتى وأنتِ معايا .
فارتبكت حنين وتوترت قائلة …دكتور طلعت ، ارجوك ميصحش الكلام ده .
