ممرضة دمرت حياتى ٣
وتبقا جمبى واشوفك على طول ونتسامر زى زمان .
وحط مرتب لنفسك يا صاحبى زى ما تحب وبزيادة كمان .
فابتسم غنيم …لانه يعلم أنه يريد مساعدته ولكن لا يريد اجراح شعوره .
ولكنه تقبل لانه فعلا يحتاج العمل ، بعد أن تنازل عن كل ما يملك .
غنيم …اكيد يا صاحبى ،دى حاجة تفرحنى انى اكون جنبك لآخر العمر .
الحاج محمد …خلاص مستنيك ، ولا مش قادر تبعد عن العروسة .
غنيم بضحك …لا جيلك طوالى اهو .
حلا……خير يا حبيبى ، رايح على فين ؟
غنيم …هروح اشتغل عند الحاج محمد صاحبى .
حلا بغصة مريرة…انا اسفة يا حبيبى .
انا السبب فى انك تسيب املاكك وتروح تشتغل عند الناس .
فأمسك غنيم يدها وقبلها قائلا …انتِ كل ناسى ، ولو اقدر اديكى عمرى مش هتأخر كمان .
وانا بحب الشغل فى اى مكان سواء بتاعى أو بتاع غيرى .
كله رزق من الله حلو ، ربنا يديم علينا ستره .
……..
تعددت لقاءات خالد مع روان .
خالد بتوتر وارتجاف …بقولك يا رورو ، قومى اعمليلى كوباية عصير من العصير بتاعك اللى كله مزاج ده .
عشان بيظبط دماغى .
عشان حاسس انى مصدع اوى ومش شايف .
روان بابتسامة نصر …الف سلامة عليك يا خلودى .
حاضر هقوم حالا اعملك ،فذهبت واذابت فيه المخدر كالعادة واتت إليه ، فخطفه منها سريعا بلهفة .
روان …تصور حظك حلو النهاردة ، عشان دى اخر كوباية عندى منه .
ففزع خالد قائلا …اخر حاجة ازاى ؟
انا مش برتاح غير لما اخده ، طيب بتشتريه منين وانا اروح اجيبه ؟
روان …لا ده عصير مستورد ومش موجود كتير للأسف وغالى .
خالد ..لو بكنوز الأرض اجيبه ، مفيش حاجة بتريحنى غيره .
انا مش عارف ده ايه ؟
اول مرة احتاج لحاجة بالشكل ده .
روان …هحاول والله ، بس محتاجة مبلغ
عشان ابعت حد يجيبه من برا مخصوص.
خالد …اى مبلغ انا تحت امرك ، المهم اجى المرة الجاية يكون موجود .
روان محدثة نفسها …فاضل على الحلو دقة ، المرة الجاية هخليه يجوزنى غصبا عنه .
عشان كده خلاص استوى على الاخر ،وروحه بقت فى ايدى .
ثم ضحكت بشماتة مرددة ….والبركة فى العصير .
وبالفعل عندما ذهب لها مرة أخرى ،ويكاد الصداع يفتك به وجسده يرتجف .
خالد …رورو ، انا محتاج العصير بسرعة لو سمحتى .
روان بمكر…والله لسه مجليش الشحن على وصول إن شاء الله.
خالد بفزع …ازاى ؟
وانا اعمل ايه دلوقتى ؟
مش قادر محتاجه اوى .
روان …معلش اصبر يومين تلاتة يكون وصل .
