ممرضة دمرت حياتى ٣

توقف حكيم لحظة ووضع يده على رأسه وكأنه لا يستوعب كلمة واحدة مما قالتها حنين ، وكأنه اتصل برقم خطأ .
ليحاول بعدها اخراج كلماته التى تحشرجت فى عنقه بصعوبة …حنين انا مش فاهم اى حاجة من اللى أنتِ بتقوليه ده خالص .
ارجوكى كده أهدى وفهمينى براحة فيه ايه ؟
ومهندسة ايه ؟ وطلعت ايه يا حنين ؟
أنتِ معقول طلعت قدر يأثر عليكى وينسيكى حكيم !!
حنين ..أنساك ؟
انت اللى نستنى يا حكيم .
ومتحولش تنكر ،صورتك وكلام الحب مع زميلتك فى الجامعة لولو ،وصلت لغاية عندى .

تجمد حكيم مكانه محدثا نفسه …ياه البت دى طلعت شيطان للدرجاتى ،مقدرتش تعلقنى بيها ، تقوم عايزة تنتقم منى وتخرب حياتى .
بس ازاى عرفت حنين اصلا .
ده محدش يعرف غير
بس معقول ! يكون مؤمن هو اللى حكالها .
اه ممكن ماهى على قد علمى قريبتهم .
بس برده هيكون جاب تليفونها ازاى ؟
وادهولها ليه ؟
معقول باعنى عشان خاطر اخوه ؟
ما صح زى المثل اللى بيقولوا عليه.
انا واخويا على ابن عمى .
بس اعمل ايه دلوقتى واثبتلها انى مظلوم ازاى ؟
حكيم …مش عارف اقولك ايه يا حنين ؟
بس كل اللى اقدر اقلهوك ، أن ربنا بينى وبينك .
وانى مظلوم وده افترا ، والبنت كانت دايخة وفجأة لقيتها سندت عليا .
لكن والله ما بينى وبينها اى حاجة .
والكشكول كان معاها ، خدته غلاسة عشان تنقل المحاضرة.
لكن مفيش فى قلبى غيرك يا بنت خالتى .
حنين …والله وعايزانى اصدقك .
لااا خلاص ،انتهى .
ثم أغلقت الخط فى وجهه .
لتجده يرن من طلعت كثيرا .
ولكنها تجاهلته بنفور قائلة …عايز ايه منى ده ؟
اكيد عايز يصطاد فى المية العكرة.
بس انا خلاص معدتش آمن لصنف الرجالة كله .
وهقفل قلبى على كده .
ومش هروح المستشفى دى تانى اصلا .
والرزق على الله .
……
أما حكيم فانتابه الغضب وشعر بغصة مريرة تتنابه خصوصا من خيانة صديقه المقرب مؤمن .
ليتصل به معاتبا مرددا …كده يا صاحبى مكنش العشم .
تابعنى عشان اخوك .
مؤمن بنفى…انت بتقول ايه ؟
اخو مين يا عم ؟
طب وبعزة جلال الله ، انت اغلى عندى من اخويا .
حكيم ..مهو واضح !
بس اللى عايز أفهمه جبت نمرتها ازاى ؟
وعطتها كمان لولو عشان تفرق بينا .
وانا اللى فاكرك صاحبى وقلبك معايا .
مؤمن …انا مش فاهم حاجة خالص .
حكيم …لا فاهم ، وعارف ان اخوك عينه من حنين .
من ساعة ما شافها ، فسهلت له الطريق .
ووصيت لولو تعمل الحركات القرعة دى .
لغاية مخدتش الصورة ووصلتها لحنين .
مؤمن .. لولو .
ابدا والله ما حصل صدقنى .
معقول تصدق فيا كده !
ده احنا عشرة سنين يا صاحبى .
حكيم …اعمل ايه ؟
انا حاسس انى مخنوق وهموت .
حنين مصدقة اللى حصل وهتبعد عنى .