عشق لاذع ٨
اخر كلام عندي ياجواد، ابنك يطلق بنتي وانا هعرف اعالجها كويس
جذب جواد جاسر بقوة
-حاضر ياصهيب، هنعملك اللي يرجع كرامة بنتك..خلي عمك يعالج بنته من مرض حبك ياجاسر زي مابيقول
..توقف جاسر يوزع نظراته بينهما حتى استقرت على زوجته التي بأحضان والدها ثم استدار وتحرك مهرولا للخارج وخلفه جواد
تركت والدها وتحركت خلفه تبكي بصوت مرتفع، حتى قابلها عز الذي ولج بسيارته بخروج جواد وجاسر
وصل إلى حي الألفي ..استدار برأسه إليه:
-انزل حبيبي لازم نتكلم ..هز رأسه بالرفض
-بابا أنا تعبان وعايز ارتاح
ربت على كتفه وهتف
-اعمل زي ما قولتلك ياجاسر هتريح الكل ياحبيبي، شهر واحد، عمك يراجع نفسه، وانت كمان تكون خلصت قضيتك ورجعت، واتخلصت من فيروز، امسك العصاية من النص ياجاسر وراضي جميع الأطراف
أشار على صدره وهتف بنبرة حزينة
-ودا يابابا، وجعه اعالجه ازاي، ازاي هقدر انام ومراتي بعيد عني، ازاي هرتاح وانا عارف انها تعبانة
-اقعد معاها وفهمها، فهمها انت ناوي على ايه
تراجع بجسده ينظر لوالده:
-بابا لو سمحت عايز افضل لوحدي ممكن!!
-جاسر!!
-بابا !!..لو سمحت
ترجل جواد من سيارة ابنه
-شوف هتعمل إيه وأنا معاك، بس اي خطوة هتعملها لازم تقول لجنى عليها ياجاسر، بلاش تعمل حاجة وتسبها كدا
أومأ برأسه واستدار بسيارته
متجها لمكتب راكان …وصل بعد قليل
-فاضي!!
أشار بيديه بعدما أغلق جهازه المحمول
-ايه اللي رماك عليا
أخرج من جيبه فلاشة وتحدث:
-عايز اعرف مين دول من غير ما أظهر في الصورة
وضع راكان الفلاشة بجهازه وقام بتشغيلها للحظات، ثم نزع نظارته الطبية وتحدث بصوته الرخيم :
-دول مجمعين الكل ..تمام هشوفلك مين دول، وتقريري هيكون عندك
اقترب متكأ على مكتب راكان
-فيه معلومة مش متأكد منها بس حستها طعم علشان يعرفوا انا براقبهم من خلال فيروز ولا لا
استمع راكان بتركيز ثم تسائل:
-ليه عايزين الولد دا، السؤال دا اللي مفروض تشغل بالك بيه
تنهيدة عميقة أخرجها بأنفاسًا ثقيلة ثم أجابه:
-علشان اكتب على فيروز، وبعد كدا اضطر اوافق على شروطهم بعد طبعا ماتورطني دا اللي قدرت أوصله
-دا ايه الغباء دا؟!
-مش مقتنع ازاي تورطك وهي عارفة قوة جواد الألفي، لا الموضوع اكبر من كدا
-ممكن عن طريقها يهربوا مخدرات
ضيق راكان عينيه متسائلاً :
-تقصد ايه مش فاهم ؟!
-معندكش قهوة ولا إيه ؟!
