تزوجها
أنهى جملته ليصرخ فى أحد أفراد الأمن .
_ أنا عايز أفهم مين غريب دخل بدون دعوى وفين الكاميرات يا أغبية ؟
أبتلع ريقه بتوتر وأحد كفيه يمسك بالآخر ناظراً فى الأرض.
_ أأ … أحنا لقينا الكاميرات متعطلة من المغرب يا فندم وبلغنا الشركة المسئولة ف ردوا أنهم هيجوا بكرة بسبب ضغط شغلهم، وفعلاً كل اللى دخلوا بدعوات مفيش أى مخلوق دخل من غير دعوى .
أبتسم رياض متهكماً بدون إبداء أى رد فعل،
أما منذر فتحدث منفعلاً:
_ يعنى إيه ؟ يعنى كل حاجة مترتبة ؟
_ أ أ أنا مش عارف لسه يا فندم أى حاجة .
هب رياض واقفاً فى مكانه ماسكاً ياقة قميص فرد الأمن بغضب .
_ أمشي من وشي حالاً بدل ما أ.ك .
ثم رماه على الأرض ليقوم فرد الأمن مسرعاً إلى الخارج .
وقف منذر بجوار رياض يحدثه بهدوء .
_ وبعدين؟ كده كل اللى خططناله راح .
_ مفيش حاجة هتروح من إيدى لا ورد ولا الأملاك ولا حتى اللى كان السبب فى مــ,,ـــــوت أخوك .
ثم تحرك خارجاً بغضب عارم من أمام والده .
كان ينتظر الصباح بشوق حتى يرى وردته فكان متأكداً من نزولها له لتطمئن عليه، إلى أن سمع دقات هادئة على باب شقته تحرك على أثرها بصعوبة بالغة ليفتح الباب بعد أن أستند على الحائط .
بمجرد فتحه للباب أبتسم بعد أن وجد تلك الأبتسامة التى طالما حلم برؤيتها .
_ صباح الخير ياسو .
_ صباح النور، بلاش ياسو دى هنا علشان لو حد سمعك مش هخلص من الكلام .
_ أنا بقولهالك ع طول .
_ مش هنا، كل مكان له قواعده وهنا لو حد سمع ياسو دى مش هخلص تريقة .
_ خلاص خلاص يا أستاذ ياسين، هنفضل واقفين على الباب كده ؟
تحرك بصعوبة ليجلس على أقرب مقعد للباب فاتبعته للداخل .
_ بصي يا ورد، عايزك بس تعرفى أن زى ما قولتلك كل مكان له عاداته وتقاليده.
نظرت له ببلاهه بعد أن جلست بجواره بأريحية .
_ يعنى إيه ؟
_ يعنى هنا مينفعش تدخلى شقة واحد أعذب عايش لوحده.
_ بس كنت بجيلك فى أوضتك عندنا .
_ بالظبط عندكم، هناك محدش يقدر ينطق حرف فى حقك والناس كلها بتحبك وعرفاكى لكن هنا مجرد دخولك عندى ولو حد لمحك موجوده مفيش حد هيسيبك فى حالك، ووقتها أنا مش هسكت، ف الأفضل بلاش تنزلي .
عقدت ما بين حاجبيها معترضة على حديثه، لا تدرى بأن حديثه يؤلمه أكثر مما يغضبها، فهبت واقفه فى غضب بالغ .
_ تمام،مش نزلالك تانى وأنا غلطانه أصلا إنى جيت أطمن على حد زيك .
