تزوجها الاخير
_ أأ … أنت بتهزر .
_ لأ، أنا عايز أتجوزك، تتجوزينى يا بنت السلطان .
تعجبت من جملته ليرددها مرة أخرى بعد أن أمسك يدها .
_ أيوا أنتى بنت السلطان، وأنا الشاطر حسن اللى لا يملك ناقة ولا جمل، بس مش معايا غير قلب عاشق وشاري يا بنت السلطان .
ولا حتى فى أحلامها كانت لترى ذلك، ياسين يمسك يدها ويسمعها من الغزل أجمله، أهو حلم ؟
سحبت يدها بهدوء وأخذت تقرص فى كفها الأخر ووجنتها .
_ أنا عارف أنك مجنونة بس مش للدرجادى .
_ أنا بحلم .
_لا .
نظرت إلى والدتها خلفه لتحثها على الموافقة، نظرت قليلاً إلى عينيه وأجابت:
_ موافقة .
زغاريط ملئت المكان من أكثر من مصدر تلك المرة، وأنطلقت التهانى والمباركات من الكل ماعدا عبير التى لملمت عبائتها المفتوحة تتحرك بميوعة نحو الخارج تنظر ل ورد بقرف مرة أخرى وقبل أن تنزل :
_ابقى اعزمنى يا ياسين على الخطوبة علشان الواحد جاله كبت من العيلة الهم اللى فيها.
ثم نظرت ل ورد غامزة إياها تلك المرة .
_ مبروك يا حلوة، أخدتى زينة شباب الحارة والله، بالإذن .
وزغرطت .
حينها أنفجر الكل فى الضحك .
جلس الجميع فى شقة ورد ليتفق ياسين مع والدتها على كل شىء.
_ أنا شايف أننا نقرأ فاتحة لغاية ما أهلى يجوا وقتها نعمل خطوبة عائلية لغاية ما الأمور تستقر وبعدها نتجوز على طول إن شاء الله.
_ ممكن نقعد لوحدنا على أنفراد يا ياسين ؟
قالتها ريحان فقام ياسين يحركها نحو غرفتها وأغلق الباب فى وجه ورد التى حاولت أن تطل برأسها لتعرف عما يدور الحوار بينهم، لتذهب متذكرة بجوار سارة .
_ عجبك كده؟ قفل الباب فى وشي ومسمعتش بيقولوا إيه .
_ يا بنتى أصبرى دلوقت كلما نعرف إن شاء الله.
_ أثبتى يا ورد، لا إله إلا الله طول عمرى أقوله أنت عاقل يا ابن أختى وربنا يرزقك بعاقلة زيك ألاقيها مجنونة .
_ يا طنط عايزه أطمن .
_ هنطمن كلنا دلوقت .
مر وقت قليل ثم خرج الأثنان .
_ ها أتفقتوا على إيه ؟
قالتها أم عمر لتنظر نحو ورد المتذمرة .
_ أحنا أتفقنا أن مفيش خطوبة .
_نعم ؟
قالتها صارخة بعد أن سمعت جملته ليضحك على طريقتها ثم يعدل ما قاله .
_ واقعه فيا أنا عارف، مش قصدى، مفيش خطوبة علشان هنكتب كتاب على طول أول ما الجماعة يوصلوا إن شاء الله وهنأجل الفرح لغاية ما الأمور تستقر إن شاء الله.
تلك المرة وقفت ورد فى منتصف المكان لتزغرط .
