أمنية وسر السعادة

_مش عارف ليه يا عماد بجد ولا بستعبط… طول عمرك الأول في كل حاجة والأضواء كلها عليك…حتى الشركة مسكتها إنت وكنت انت مدير الإدارة فيها …رغم ان أبويا أنا اللي كان ماسكها يعني أنا أحق بيها منك ..ورغم ذلك أبويا مسكهالك انت مش أنا… عامي عيون الكل كأنك ساحرلهم ومش شايفين غيرك .انت أخدت كل حاجة حلوة …عندك أخت في حين إني وحيد … وحتى أمك بصحتها وأمي أنا اللي عاجزة…رافع مناخيرك وشايف نفسك الكل في الكل وكلنا شغالين عندك وتحت أمرك.. طول الوقت الكل بيقارني بيك وبيختاروك انت في المفاضلة.. لحد ما ربيت في قلبي كل الحقد والغل من ناحيتك …علشان كدا لازم أحسسك بالذل وكسرة القلب اللي بحسها كل يوم وكل ليلة

_كل اللي قلته ده أنا مليش ذنب فيه ..وملقش الحق أبدا انك تحقد عليا بالشكل الحقير ده… انت انسان طماع يا سمير مش مبسوط بالنعم اللي ربنا عاطيهالك وبتبص دايما للي في أيد غيرك … لو كنت رضيت باللي معاك كنت هتعيش طول عمرك مرتاح .. لكن طول عمرك مبتتمناش الخير لغيرك وعايزه كله ليك… أمي وأختى اللي بتحسدني عليهم دول .. ربنا عوضني بيهم عن أبويا اللي اتحرمت منه من وأنا صغير وعشت طول عمري يتيم لولا أبوك اللي ضمني لحنانه علشان محسش أنا وأختي باليتم في وجوده لو كان عاجبك حالي متبصش للي شايفة قدامك.. شيل شيلتي كلها وانت تعرف … جربت انت أحساس انك تفقد أبوك وانت صغير في عز حاجتك ليه… انك تشيل المسؤلية بدري من قبل ما حتى تعرف يعني ايه مسؤلية… انك تواسي أمك وأختك وتطبطب عليهم وانت نفسك محتاج اللي يواسيك ويطبطب عليك… جربت تشتغل ليل ونهار علشان متسبش عيلتك محرومين من حاجة!! … بس انت هتحس بده ازاي وانت مولود وفي بوءك معلقة دهب كل اللي بتشاور عليه بتلاقيه من غير حتى ما تتعب في التفكير فيه… لسه نازل الشغل من كم سنة وبتقارن نفسك بواحد نزل سوء العمل من وهو عنده ١٢ سنة .. انت بتتكلم في إيه ..

لما أبوك عَيني أنا مدير للشركة فده علشان أبوك كان لسه شايفك صغير مش حمل المسؤلية الكبيرة دي فعيني أنا مكانك لحد ما عضمك يقوى … ولو صبر القاتل على المقتول كان مات لوحده زي ما المثل بيقول… انت لو كنت صبرت على رزقك كنت هتعرف اني كنت بصفى حساباتي من الشركة علشان أفتح شركة صغيرة على قدي بفلوسي أنا وشقى عمري سنين …وكنت هسلمك شركة أبوك زي ما هيا وأحسن كمان ومكنتش حتى هسيبك كنت هقف جنبك لحد ما تفهم أمور الإدارة ماشية إزاي …. أنا عمري ما كرهتك يا سمير وشايفك أخويا وصاحبي…