أمنية وسر السعادة
قالها والأخوان
عماد وسمر بياكلوا في نفسهم …
عماد كان بيختلس النظرات ليا بحسرة وهو بياكل في نفسه اني روحت منه …وكالعادة مقدرش يشوف ضحك سمير معايا فقام مشي راح على الحديقة وهو حاسس بالخنقة
فك الكرفات اللي حوالين رقبته يمكن تخفف عنه خنقته شوية
بعد الغدا …سمير انشغل في اوضة مكتبه وانا افتكرت حاجة فخرجت لعماد
_أنا .. أنا حاسة اني شفتك قبل كدا
اول ما شافني عينه لمعت واتكلم بلهفة
_انتي مش فاكراني يا أمينة !!
فلاش باك لمشهد حصل من فترة
كنت رايحة أقف عند موقف الميكروباص ومتأخرة وعايزة أروح بسرعة فلمحت ميكروباص معدي فجريت وراه علشان يركبني معاه مش عايزة اتأخر أكتر من كدا
ومن لخمتي مأخدتش بالي ان فيه عربية كانت هتخبطني ومرة واحدة لقيت واحد بيشدني من دراعه وهو بيقول
_حااااسبي .
وشدني بعيد رجعني للرصيف تاني
وبعدها زعق وقال
_انتي يا متخلفة ازاي تجري كدا زي الهبلة في نص الطريق.
بصتله بضيق وقلت
_انت بتزعقلي ليه وانت مين أصلا
_أزعقلك بس ده أنا خنقك يا معتوهة انتي
_الله ما تلم لسانك يا جدع انت هو ايه أصله ده … ايه رمي البلا على المسا ده
_والله انتي شايفة اني برمي بلايا عليكي.
_ايوة ومش بعيد تكون متحرش بس نضيف شوية
عماد ضم إيده بغضب وقال
_امم. ياريتني يا شيخة ماكنت انقذتك .. وكنت سيبتك تندهسي تحت عجلات العربية .. وخلصت من لسانك الطويل اللي عايز قصه ده .
_يا سلام أنا لساني طويل ولا انت .. مش انت اللي ابتديت بالغلط يا أستاذ انت ونعتني بالمتخلفة والهبلة…يبقى مين اللي غلطان .
عماد وشه بقى أحمر وقال
_ايوة أنا اللي غلطان فعلا… وسايبلك المكان وماشي
جريت وراه الحقه
_استنى يا أستاذ انا لسه مشكرتكشي.
بصلي بضيق
_ماخلاص شكرك وصل يا انسة
مشيت وراه تاني
_استنى يا أستاذ والله شكرا جدا .. معلش بقا كنت مخضوضة ومش دريانة بقول ايه ..
مرة واحدة وقف فكنت هخبط فيه وقال وهو رافع صوباعه في وشي
_بعد كدا تنتبهى على نفسك وانتي ماشية مفهوم .
_مفهوم يا بابا حاضر
_ايه!!.. بابا ايه انتي عبيطة !!
_رجعنا تاني للغلط وطولة اللسان
_هو ايه اللي مفهوم يا بابا حاضر
قالها وهو بيقلد صوتي وبيقلس عليا
_ماهو أصلك بتنصحني ففكرتني بأبويا الله يرحمه … كان دايما يقولي كدا .
