أمنية وسر السعادة
_الحمد لله … طب .. طب هو مش داري بينا ليه.. ليه لسه مغمى عليه .
_أحنا حاطين ليه منوم في العلاج علشان الألم ..اطمني اربعة وعشرين ساعة وهيبقى كويس ويقدر يخرج من المستشفى كمان بس على شرط يأخد باله من صحته ويكمل علاجه ويرتاح في البيت
_ايوة طبعا ان شاء الله يا دكتور بس هو يقول بالسلامة
_ان شاء الله
مشي الدكتور وكلنا قربنا من عماد حتى أنا زعلت علشانه وحسيت اني لوحدي بواجه الشر .
سمر فضلت تعيط خوف على أخوها اللي مش عارفة مين عمل فيه كدا.
فسمير قرب منها وحاول يهديها
_سمر اهدي.. انتي مش سمعتي كلام الدكتور طمنا وقال ايه .. متزعليش نفسك هيكون كويس.. تعالي كدا عايزك في كلمتين برا .
سمر خرجت معاه وهيه لسه بتبكي.. ومحدش أخد باله من دا لأنهم كانوا مشغولين بعماد
لكني أخدت بالي وخفت على سمر ومشيت وراهم .
لقيت سمير بيقولها
_سمر أنا عايز أعترفلك بحاجة.. أنا بحبك انتي مش بحب أمينة
_ايه بتحبني
_ايوة يا سمر دي الحقيقة
_ولما هي الحقيقة اتجوزت أمينة ليه!!
_هقولك …بس الاول في مفاجأة ليكي في العربية تحت.. ياريت تيجي معايا نجيبها
نزلت معاه زي المغيبة وهناك كمم سمير بوءها بإيده ودخلها العربية وربط ايديها وكمم بوقها بقماشة مجهزها معاه .
وأول ما شافني اتصدم فأنا جيت أجري لحقني ومسكني وربطني انا كمان وكمم بوءي وعلشان منحاولش نهرب او نثير الانتباه رش في وشنا منوم فنمنا
__
صحيت لقيت نفسي متكتفة أنا وسمر في مكان غريب بس مش في الفيلا
وبعد شوية دخل سمير وفضل يضحك
_ها ها ها ها
أنا ما شوفته كدا صرخت وقلت
_يا لهوتاااااي… هي دي النهاية .. زعيم المافيا سمير الجزار أكيد مخبي السكينة في هدومه علشان يقطعنا …اااه يانا ياماااااا … مشيتي وسبتي بنتك ليه ياماااا .. هيقطعوها حتت ويرموا اللي فاضل منها للكلاب يا ماااا
سمير زعقلي وقال
_باااس انكتمي …انتي ايه ياشيخة …من يوم ما شفتك وانتي صداع … صداااع انكتمي بقا .
_هنكتم حاضر … ما أنا عارفة اني هنكتم للأبد .. بص بالله عليك نيمني تاني ولا حطلي مخدور علشان محسش بحز السكينة على رقبتي .
سمير قرب مني وزعق
_انتي عارفة لو مسكتيش أنا فعلا هجيب السكينة اللي دوشاني بيها وهقطعك بحق وحقيقي
_الله اومال انت جايبا هنا ليه مش علشان تقطعنا بجد… انت هتقطنا بهزار يا سمير الجزار!!
