أمنية وسر السعادة
قالها وفضل يكسر في كل حاجة وصوت التكسير واصل لسمير تحت اللي كان واقف ومبسوط أوي لأنه عارف ان زمان عماد دلوقتي هيموت من القهر علشان هو أخد منه حبيبته
فابتسم وقال
_ولسه يا عماد انت لسه شفت حاجة أنا هقهرك أكتر وأكتر ….ايوة أنا كنت عارف ومتأكد إنك بتحب أمينة ومش بس بتحبها لا بتعشقها كمان علشان كدا أخدتها منك واتجوزتها أنا بدالك .. علشان كل لما تشوفها معايا وقدام عنينك وانت مش طايلها تتعذب أكتر .
عماد مامته جت تشوف إيه سر اصوات التكسير ده لقت عماد واقف في نص الاوضة وإيده بتنزف جامد وهو مش حاسس كأنه فقد الاحساس بكل حاجة
مامته جرت عليه وبسرعة مسكت فوطة تلفها على ايده توقف الدم اللي بينزل بغزارة وهي بتعيط
_عماد … حصل ايه وليه عملت في الاوضة كدة… وسايب ايدك تنزف جامد ليه … ايه اللي بيحصلكم يا اولاد زاهر ..ربنا يسلمكم يارب .
فضلت تحاول توقف الدم وعماد مش بيبصلها نهائي كأنه مغيب تماما عن الواقع
فين وفين لحد ما مامته قدرت توقف الدم وجريت بسرعة على علبة الاسعافات الأولية علشان تمضد الجرح في إيده
لكن يا ترى هتقدر تضمد جرح قلبه اللي بينزف دلوقتي!!
أمينة وسر السيارة السودا٣
سمير طلع فوق لعندي في الاوضة اللي طلب مني أفضل فيها
فضلت مكاني متحركتش حاجة بإحساس غريب ومش مريح بالمرة
جه وقعد جنبي وأنا خفت اوي لقيته قالي
_اسمعي يا أمينة انتي عارفة ان جوازنا ليه وعلشان ايه
هزيت دماغي
_ايوة عارفة
_علشان كدا أنا مش هقرب منك .
قمت وقفت وفزعت فيه
_تك خابط في نافوخك .. تقرب مني إيه انت اتجننت … انت قلت هتتجوزني علشان تحميني وبس ..اياك تفكر في أي حاجة تانية
خبطني هو على دماغي وقالي بضيق
_جتك نيلة انتي تطولي أصلا
_مش عايزة أطول … انا اعرفك منين أصلا …المهم … قولي هنام فين .
مسك دراعي وقال
_اسمعيني الاول اللي هقولك عليه مهم
_ايه عرفت صاحب العربية السودا
_عرفتها
حطيت ايدي على راسي وبدأت انتحب
_يالهوتاااي .. صاحب العربية السودا هيقتنلي
حط ايده على بوءي
_انكتمي يا أمينة بدل أنا ما أخلص عليكي مش هو
_خلاص خلاص انكتمت ..بس قولي انت جاي تقولي ايه انك مش هتقظر تحميني … كنت عارفة… يلا معلش هموت متقطعة بس هموت شهيدة .. ميرضش… معلش يا بت يا أمينة مش هتحسي غير بحزة السكينة أول مرة وبعد كدا مش هتحسي بحاجة خالص …عاااا
