أمنية وسر السعادة
أكلته هو كمان وأنا بقول زي ما اتفقنا
_لا طبعا ده انت سميري ورَجلي وحيطتي وحاميني .
سمير همس ليا وقال
_حاميكي ايه بس هتبوظي الدنيا بغباءك اسكتي
همسته
_ايه مش الزوج بيكون سند وحما زوجته فأنا قلت حيطتي وحاميني.. قلتش حاجة غلط!!
_طب أعملي إنك محروجة كأني بتغزل فيكي .
فعملت زي ما طلب فبعتلي هوا بوسة في الهوا فعملت تاني أني مكسوفة
عماد متحملش اللي بيحصل فقام ومشي بعد ما قال بحزن مكتوم
_أنا شبعت الحمد لله
وكذلك سمر اللي جريت بسرعة حصلت أخوها
_وانا كمان شبعت .
سمير بص على عماد وهو مبسوط وقام وقف ولحق بعماد عند العربية فلقاه واقف ساند على العربية بإيديه وبعدها ضرب العربية بقبضة إيده بغضب … قرب منه سمير بمكر
_مالك يا عماد .. شايفك متضايق من امبارح من اول ما عرفت اني اتجوزت !!
_ايه لا..لأ طبعا وهتضايق ايه ..بس قولي يا سمير .. انت بتحبها !!
_طبعا بحبها دي أمينة دي حياتي كلها… هاخدها ونروح شهر العسل بس لسه بظبط نفسي علشان حابب نسافر برا مش هنا.
_اه ربنا يسعدكم .. يلا سلام أنا راجع الشركة
قالها ولف ركب عربيته أما سمير فوقف وحك في ذقنه وهو بيقول بشر
_ولسه يا عماد مبقاش أنا سمير الا وموتك على البطىء .
__
كنت طالعة على أوضتي لقيت سمر بتوقفني
_انتي.. استنى عايزاكي
ابتسمت لها وقلت
_نعم يا سمر.. إزيك أنا مبسوطة اني وسطكم هنا .
قالتلي بحدة
_انتي عرفتي سمير منين وازاي قدرتي انك توقعيه في شباكك وتخليه يتجوزك بالسهولة دي .
اتوترت ومكنتش عارفة أرد
لقيتها بتقول
_انتي أكيد طماعة وجاية علشان نفسك تكوني حاجة .. ومفكرة انك هتقدري تحققي ده بجوازك من سمير… علشان كدا وافقتي تتجوزي كدا سوكيتى من غير فرح او حفلة .
حاولت استأذن علشان امشي من غير أي كلام
_ااا.. معلش انا هدخل اوضتي
_استني أنا لسه مخلصتش كلامي … اعرفي انك هتكوني تحت عيني كل لحظة ومنتظرة ليكي أي غلطة فاهمة.. علشان مكانك مش هنا ولا حتى سمير المفروض يكون ليكي إنتي .
عرفت من طريقة كلامها وأسلوبها الحاد معايا انها كانت بتحب سمير واتضايقت انه اتجوز غيرها .
كان نفسي أقولها
_متزعليش انا مش جاية أخد حبيبك منك .. علاقتي بسمير انقاذا للموقف وبس وهمشي تاني .
___
تاني يوم على الغدا اللي الكل بيحب يجتعموا فيه عيلة مع بعض على الأكل
سمير قالي
_أمينة حبيبتي… عايزك تجهزي نفسك علشان بالليل هنخرج أنا وانتي سوا نتفسح ونشتري كل اللي نفسك فيه .
