أمنية وسر السعادة

_لا انت بتحبها من زمان انا متأكدة .. لإنك اول ما شفتها اتصدمت وكانك تعرفها من فترة ومش بعيد تكون هي دي البنت اللي حكيت لماما عليها وانك عايز تتجوزها وكنت خلاص هتروح تخطبها .

عماد قعد على الكرسي وحط راسه بين إيديه وقال وهو بيعترف

_كل كلمة قولتيها صح… أمينة هي البنت اللي كنت ناوي أروح اتقدم لها وأخطبها… فضلت ماشي وراها بعربيتي كل يوم علشان اطمن عليها وعرفت عنها كل حاجة واتعلقت بيها من غير حتى ما هية تعرف بده … ايوة أنا بحبها بل وصلت كمان لمرحلة العشق … أخوكي بينهار يا سمر ومحدش داري بيه مش عارف أخرج حبها من قلبي

قربت منه وحضنته وقالت
_قلبي عندك يا عماد أختك كمان قلبها بيتآكل من الألم … أنا كنت متعشمة ان سمير يشوفني ويحبي زي ما بحبه.. واصدمت لما شوفته راجع بمراته .. متعرفش أنا كنت بموت إزاي ولسه لحد دلوقتي بتقطع من جوة

عماد بصلها بصدمة هو مكانش يعرف ان أخته بتحب سمير

سمر بعدت عن أخوها وقالت بصوت كله شر

_اسمع يا عماد احنا لازم نعمل حاجة نصلح كل اللي بيحصل ده

_هنعمل ايه يعني ما خلاص كل حاجة راحت ربنا يسعدهم

_لا ..في إيدينا نرجعها بس اسمع مني هنعمل ايه .

_مش فاهم قصدك ايه

_اسمع .. احنا هنعمل خطة نبعدهم عن بعض … أنا هطلب من أمينة تنزل تستناني هنا في المرسم … وانت هتكون انت اللي موجود مش أنا …وهبلغ سمير اني شوفتكم مع بعض فهينزل جري طبعا .. وانت تحاول توهمه ان في بينكم علاقة مع بعض فهيقوم يغضب ويرمي عليها يمين الطلاق وبكدا ترجعلك وسمير يرجعلي أنا .

سمير اتضايق أول ما سمع كلام سمر وقال بشر
_بقا كدا يا سمر انتي وعماد الكلب ده بتتفقوا عليا… أنا هوريك هعمل فيك ايه يا عماد

ومشي بسرعة من المكان.

اما أنا ففضلت واقفة أكمل الخطة اللي بيقولوا عليها وانا كنت خلاص اتأكدت ان سمير كان بيخدعني طول الوقت

_بقا كدا يا سمير طلعت كداب ومحتال ومخادع كمان… عماد مش زعيم مافيا ولا حاجة .. ده طلع بيلاحقني علشان بيحبني وخايف عليا وعايز يتجوزني ومش بعيد تكون انت زعيم المافيا والشرير اللي في المكان
.
سمعت عماد بيقول وهو بيزعق لأخته

_انتي اتجننتي رسمي يا سمر .. مش أنا اللي أعمل حاجة دنيئة زي كدا أبدا… ان كانوا هما سبقوا واتجوزوا فربنا يسهلهم والمفروض تدعيلهم بالبركة مش تحقدي عليهم بالشكل ده وتحاولي تفرقي بينهم بالأسلوب الحقير ده