أمنية وسر السعادة
بالصدفة سمع الكلام ده سمير اللي كان يتمنى الشر لعماد ومش مبين ده
_حلو والله وعرفت ايه هيه نقطة ضعفك يا عماد اللي بيها هقدر أذلك وأكسرك .
ونفذ خطته وجه ضحك عليا واتجوزني علشان يقهر عماد مش أكتر
##
عودة
_
هزيت دماغي وقلت
_ايوة ايوة افتكرتك انت الشاب أبو لسان طويل وعايز قطعه اللي كنت بتزعقلي زي بابا .
عماد رفع حاجبه وكشر وقال
_مم هو ده اللي افتكرتيه عني
ضحكت وقولت
_معلش أصلي ذاكرتي ذاكرت سمك .. حقك عليا يا أستاذ عماد
ضحك وقال
_ماشي يا ست السمكة انتي .
اول مرة أشوفه بيضحك من يوم ما دخلت الفيلا هنا .
ومرة واحدة لقيت سمير بيقرب مني وحاوطني بإيده وطبع بوسة على خدي
_حبيبي انشغلت عنك معلش أنا عارف اني مقصر معاكي جدا …. تعالي هعوضك عن تقصيري ده .
عماد او ما سمع كدا شاط وراح طلع عربيته من الجراج علشان يمشي .
اول ما عماد مشي سمير زعقلي
_انتي ازاي تقفي تحكي مع عماد
_عادي وفيها ايه .. افتكرت انه هو الشاب اللي انقذني فروحت أساله ان كان هوا ولا لأ .
_بتقفي مع زعيم المافيا برجليكي
شقهت وحطيت ايدي على بوءي
_ايه … يالهوتي ياااني .. مين أستاذ عماد هو زعيم المافيا اللي عايز يخلص عليا ويأخد أعضاءي
ومشيت إيدي على رقبتي زي حركة السكينة كدا
شاورلي على العربية اللي بتخرج من بوابة الفيلا وقال
_بصي شوفي اتأكدي من العربية بنفسك
صرخت وحطيت إيدي على دماغي وبدات اولول
_يا لهوتي …يا ميلة بختك يا أمينة
_اهدي يا مصيبة انتي اللي في الفيلا هيسمعوا
_يسمعوا … انت جايبني بنفسك لحد عنده انت كمان شريك معاه ولا ايه
_لااا أنا لازم انفد بجلدي… لا يمكن أقعد هنا لحظة
مسك ايدي وقال
_اقفي هنا …انا شريك معاه ده ايه .. لو شريك معله هجيبك وسط اهلى واتجوزك يا ام مخ تخين
_اومال جايبني في وكر زعيم العصابة ليه يا أبو المفهومية
_علشان ببساطة لما يعرف انك مراتي وبقا ليكي ضهر هيغير رأيه ومش هيقدر يقرب منك… وهيروح يدور على حد تاني غلبان غيرك .
بلعت ريقي بخوف
_ايوة بس أنا مش هقدر أقعد معاه في نفس المكان تاني .. بالله عليك خدني من هنا او رجعني عشتي بس بلغ عنه الأول
_هيحصل بس لما أمسكه متلبس .. المهم تمسكي نفسك ومتبنيش ليه اي حاجة خالص .
بدات أعيط
_أمسك نفسي إزاي وانا هيغمى عليا الوقتي أهون… أنا مش هخرج من أوضة الهدوم تاني .. أقولك انا هقفل السرير المتخفي عليا هنام فيه وأنا واقفة… ايوة ما هو العمر مش بعزقة… صحيح انا كنت عايزة اموت علشان أحصل أهلي بس أموت موتة حلوة لكن متقطعة لا .. اي نعم مش هحس بالتقطيع .. بس بردو فكرت فيها لقيتها مش حلوة … لازم أختار موتة اريح من كدا .
