ممرضة دمرت حياتى ٢

روان بغضب ..لا شقة ايه ؟
افرض الجيران اشتكوا وبلغوا وهوب لقينا مباحث الآداب فوق دماغنا .
لا انا مش عايزة فضـ.ايح ، كمان مقدرش ابات انت ناسى انا ورايا مرات اب لما بتأخر بس شوية ،بتسمعنى كلام ملهوش لزمة ،وببقى عايزة اخنقها بإيدى دى .

أمجد …يادى مرات ابوكى اللى وقفلنا زى المية فى الزور دى .
مقولتلك على طريقة نخلص منها خالص ، ولا من شاف ولا مين درى .
لمعت عين روان قائلة…قصدك الزر.نيخ اللى احطهولها فى الأكل لغاية ما تسمم وتموت .

بس لأ اخاف برده يكشف الموضوع وأروح فى حديد .
امجد …قولتلك ما تخفيش ،محدش بيكشفه خالص
لو اتحط بنسب صغيرة فى الأكل .

روان بقلب يرتجف …طيب خلينى افكر شوية فى الموضوع ده .
وباى دلوقتى يا امجودة.
امجد ..برده ماشية ،طيب هتوحشينى كتير لغاية بكرة .
بس تعالى بدرى اكتر .
عايزين نقضى وقت أطول مع بعض .
روان بدلال …بس كده عيونى .
ثم طبعت قبلة له على الهواء .
وغادرت ، لتلقى مصيرها الذى ينتظرها على يد مديحة والست راضية .

الست راضية فى منزل مديحة رددت …هو لسه السنيورة مجتش كل ده ؟
لا كده كتير وانا عايزة اروح ، الوقت اتاخر والنبى حرصه وصينه جوزى ، هيقلق عليه كده .
فضحكت مديحة بسخرية قائلة …يختى خلاص يعنى الحب مقطع بعضه ، ايش كان بنفسى بسمعوكوا بتتخنقوا مع بعض وصوتكوا مسمع الحتة كلها .
ولا صوت القلم بتاعه اللى بيلسوع ده ، بيخرم ودانى الاتنين .
الست راضية بحرج ..يوه يا اختى ، مهو ضرب الحبيب زى اكل الزبيب .
مديحة …اه _قولتيلى .
خلاص متقوليش اتأخرتى ، وتاخرى براحتك ، عشان لما تروحى يزود فى الزبيب .
ثم قالت السيدة الأخرى التى معها …امال فين يا اختى جوزك ، ابوها يعنى ؟
وهو عارف الموضوع ده ولا ايه ؟
عشان لو طلعت صاخ سليم ، متشتكيش ليه .
وساعتها يلومك ولا يزعل منك .
فضحكت مديحة قائلة بثقة …يزعل منى ايه يا اختى .
لا متقلقيش ، انا ممشياه على العجين ميلغبطوش .
ومبيقدرش يقولى تلت التلاتة كام .
مسيطرة يعنى زى ما بيقولوا .
وبرده عشان زيادة الحرص ، زرفته عشرة جنيه ، يشرب بيها شاى على القهوة ،هو والمقاطيع بتوعه .
عشان يبعد عن خلقتى عقبال ما نشوف الموضوع ده .
الست راضية …قوية أنتِ يا مديحة اوى .
مديحة وهى تشير بكفها لها ….كى لا تحسدها .
خمسة وخميسة يا اختى .
امال فكرانى خايبة زيك
قال ضرب الحبيب زى اكل الزبيب قال .