فى سبيل صهيب ٢
شاهندة: بس…
سبيل قاطعت كلامها بحزن: ما بسش انسي خلاص اللى حصل حصل، المهم حاولي تهدي شوية وما تتكلميش مع حد فـ الكلام اللي قاله هاني وسيبيلي انا الموضوع ده هحلهولك من جذوره، بس حاولي ما تستعجليش فـ الجواز اصبري شوية.
شاهندة بدموع: انا بحاول بكل قوتي لاني خايفة اوى والله من تغييره المفاجئ ده.
سبيل: ممكن تكون دي حقيقته اصلا يا شاهي وقناع البراءة اللى كان لابسه وقع لما لاقاكي أجلتي معاد الفرح، اهدي وما تبينيش قصاده حاجة خليكي طبيعية وانا هتصرف، ما تقلقيش، يلا هقفل دلوقتي ولو فى اى حاجة كلمينى، بس اوعي تقولي لحد خالص اننا بنتكلم، ممكن؟.
شاهندة: حاضر يا بيلا مش هقول لحد خالص، سلام.
وبالفعل قفلت شاهي المكالمة مع سبيل وقعدت مكانها تفكر فـ كل الكلام اللي دار بينهم والاوجاع اللى فـ قلوبهم بسبب الحب واختيار الشخص الغلط، اما سبيل بعد ما قفلت المكالمة اتصلت بشخص معين ادتله اوصاف هاني وطلبت منه يراقبه كويس ويعرف لها كل حاجة عنه ويبلغها اول بأول كل تحركاته.
_____________________
فـ اوضة يمنى
دخلت اوضتها بعد ما اتأكدت ان كل اللى فـ القصر دخلوا اوضهم، نسيت تقفل الباب بالمفتاح، اتصلت بـ سبيل فيديو وحطت الهاند فري واستنت الرد اللى جالها فـ اقل من الدقيقة.
سبيل كنسلت المكالمة ورنت هى ع يمنى زى ما وعدتها.
يمنى فتحت المكالمة بملامح ملهوفة ونبرة اشتياق: وحشتيني اوي اوي يا ابلة.
سبيل بابتسامة هادية: وانتي كمان وحشتيني اوي يا حبيبتي، طمنيني عليكي عاملة ايه؟
يمنى بدموع: يومي ناقص من غيرك، حاسة اني عايشة فـ سجن، طول الوقت بين المدرسة والمذاكرة، مافيش حد بيتكلم معايا خالص، حتى شاهي بالنهار فـ المجموعة وبالليل حابسة نفسها فـ اوضتها، مافيش غيرك اللى كنتي بتتكلمي معايا ودلوقتي انتى مش هنا وانا بقيت لوحدي
سبيل غمضت عينيها تمنع دموعها تنزل، اخدت نفس وبتنهيدة حزن: معلش يا حبيبتي فترة وهتعدي، وهتتعودي ع غيابي زى ما اتعودتي قبل كدا.
يمنى: بس انا مش عارفة اتعود ع كدا ومش عايزة، انا عايزاكي انتي يا ابلة.
سبيل: انا معاكي اهو يا قلبي وهبقى معاكي كل ليلة لحد ما تتطمني وتروحي فـ النوم.
يمنى بابتسامة: عارفة يا ابلة؟! انا بقيت بحب اوى قعدة الاوضة عشان بتخليني اشوفك كل يوم.. وهى بتتكلم سمعت خبطة خفيفة ع الباب وبنبرة صوت مليانة توتر: مممين؟
