فى سبيل صهيب ٢
قدري رفع رجل فوق الكنبة وساند عليها بدراعه اللى ماسك بيه الشاي، وساب رجله التانية نازلة فـ الارض، كان قاعد ماسك نفسه طول الوقت لكن فجأة بص لـ رسلان وانـfـجر فيه بعصبية وزعيق: وبعدهاااالك عااااااد يا رسلااااان، أنت ما نويش تجفل خشمك اللى بينجط سم ديه؟
رسلان عصبيته زادت وصوته بقى عالي، رد بغضب أشد وكأن الكلام محبوس جواه وأخيرا قدر يخرجه: لع يابوي، ما عجفلش خشمي، ولازمن تِعِرف أنك السبب من الاول، يوم ما سافرت مصر واتچوزت الرجاصة وعاودت بيها ع البلد، آها ما اتحملتش عوايدنا، وبعد سنة واحدة، سابت بتها وهى حتة لحمة حمرا وهربت، ودلوكيت انت برضك اللى سِبت بتك اتروحلها، وتلاجيها خلتها زييها بتشتغل فـ الكباريهات ترجص للسكرانين وتچالسهم وتفتح لهم جزايز الخمرة بيدها.
الكلام كان زي السـkـاكين فـ قلب قدري، لكنه ما نطقش، وفضل قاعد مكانه، ونظراته كلها غضب وخيبة أمل، وكأن الحمل اللي شايله زاد عن طاقته.
عمر قرب خطوة ناحية أخوه وبنبرة صوت كلها غضب ونظرة حادة: عيب عليك يا رسلان تجول إكده عن خيتك؟! ده بدل ما تفكر تساعد أبوك ترچعها، واجف ترمي كلامك اللى كيف السم ديه، البت من لحمنا ودمنا برضك ومايصحش نجول عليها كلام عِفش.
رسلان رد وهو بيتنفس بعصبية، وعينه متسلطة ع عمر: لحمنا ودمنا؟! الدم اللي يچيب العار هدره احسن، ولو ما لاددش عليك كلامي، روح أنت دور عليها، هتلاجيها كيف ما جولت بترجص فـ أى كباريه
قدري رفع صوته بحزم، قطع الحوار بينهم وكأن كلماته كانت حكم نهائي: بس منك ليه! كلامكم ده مالهوش لازمة دلوكيت، بدل ما نجعدوا نتخانجوا، لازمن نلاجي حل، لاچل مانرچع خيتكوا من حدى العجربة أمها.
رسلان قام من مكانه وهو بيرفع حاجبه ويضحك بتريقة: لا والله، دلوكيت لازمن نلاجي حل!! وسَكت ليه يا ابوي السنين اللى فاتت ديه؟ توك ما افتكرت بتك وخايف عليها من امها! ما هى حِداها ليها 5 سنين وانت اللى وصلتها بيدك.
عمر قرب من رسلان وقف قصاده بعصبية: وبعدهالك يا رسلان، كانّك أدبيت عاد، كيف تجول لـ أبوك الحديت الماسخ ديه، أجفل خشمك بجى وما تزودش الـNـار وتشـ*ـعلها يا واد أبوى، ما ناجصينش إحنا.
عواطف قربت من قدري بخطوات هادية، ومدت إيدها ع كتفه بحنية: ما تشيلش هم يا خوي، البت مسيرها هترچع وتفهم غلطها، بس انت ما تزعلش روحك يا نضري، إحنا مالناش غيرك.
