بقلم ذات الوجه الدميم٤

لم يتحرك وقال : ماتعدي

اضطرت لتلف حول الطاوله كي تتفاداه .. نظرت له ساخطه بينما هو ينظر لها ضاحكا .. مما زادها سخطا عليه .. تعرفت على فوزيه .. جلست بجوارها .. وتبادلوا الاحاديث .. ثم تركتها فوزيه ووقفت لترحب ببعض افراد العائله .. وجدته فجأه جاء ليجلس بجوارها

لمياء : انت ايه اللي جابك هنا .. انا مش سبتلك الطرابيزه هناك؟

رامي ببرود : طنط قالتلي اقعد على الكرسي عشان محدش يقعد مكانها

كادت ان تضحك على كلامه : ياسلاااام .. طيب خليك قاعد

قامت من مكانها وقالت في سرها : الله يخربيتك مش عارفه اقعد في حته بسببك

ذهبت لغاده .. سلمت عليها وقالت : انا همشي بقى يادودو

غاده : استني البوفيه طيب

لمياء : لا اتأخرت .. انا جايه متأخر اصلا

جاء رامي من خلفها وقال : بقولك ايه يادكتوره غاده .. ماتعرفيش دكتورة تحاليل تكون كويسه ..

شريف : انت شارب حاجه يابني انت

رامي : حاشا وماشا

غاده : تحاليل ايه دلوقتي

ثم نظرت للمياء مستفهمه .. بينما قالت لمياء بنفاذ صبر : صاحبك قاطرني من اول مادخلت ياكابتن .. قوله يبعد عني والا وربنا ماهيشوف غير كل شر

شريف : انت اتجننت يارامي .. ايه اللي بتهببه ده؟

لمياء : انا ماشيه ياغاده .. الف مبروك ياكابتن .. سلام

وبعد ان انصرفت .. قال شريف : ايه يارامي فيك ايه؟

رامي : خليك في حالك .. انت مش اتجوزت .. سيبني بقى اشوف حالي ..

انتهت الحفله اخيرا .. وبات الجميع في سعاده كبيره .. جاء شريف لزيارتها لاول مره بعد عقد القران .. ولأول مره يرى شعرها ..

شريف وهو يملس على شعرها : شعرك حلو اوي

غاده : ميرسي

شريف : بجد والله انا اول مره اشوف شعر طبيعي بالجمال ده

ثم غمز بعينيه وقال : ولا هو مش طبيعي؟

ضحكت غاده وقالت وشعرها ينساب على جبينها برقه : لا والله طبيعي ..

نظر لها متمعنا وقال : ده انا حظي من السما .. بقى المزه دي هتبقى من نصيبي ومعايا تحت سقف بيت واحد .. امي دعيالي

غاده : الحمد لله .. ماما اله يرحمها كان شعرها احلى من كده كمان

شريف : حماتي .. كان نفسي اشوفها واعرفها

قالت غاده بتأثر : كانت ست عظيمه .. وبابا كمان الله يرحمه كان بيحبني اوي .. ربنا يرحمهم

شريف : ان شاء الله في الجنه ..

غاده : يارب

*****************

بدأت الترتيبات لزواج جيهان .. وترتيب المنزل بالفرش الجديد .. انتظمت غاده في عملها وفي رسالتها .. وكان الاتفاق ان يتم زواجها هي وشريف فور ان يفك جبس رجليه ..

وفي جهه اخرى ذهب رامي لمنزل لمياء وقابل والدها .. دون علمها باي شئ ..وقصد ان يكون في ميعاد عملها كي لا تكون موجوده بالمنزل .. وبعد مغادرته بقليل .. جاءت لمياء .. اخبرها والدها بان هناك عريس جاءها وانه سوف يحضر مره اخرى ليجلس معها .. وفي اليوم التالي جاء فعلا رامي ودخلت عليه لمياء وفوجئت بانه نفس الشخص الذي ضايقها اكثر من مره .. لم تتكلم بينما جلست بوجه متجهم الى ان تركهم والدها بمفردهم قليلا .. وعندما انفرد بها قالت له بغضب : وليك عين تيجي هنا كمان ؟

رامي : عشان بس تعرفي اني مش بعاكس وغرضي كويس

لمياء : عرفت .. وبعدين؟

رامي وهو يجلس بالكرسي الاقرب لها وقال : وبعدين ايه ؟ مانا جاي وطالب القرب اهو

وقفت لمياء وقالت محذره : خليك مكانك والا هطلع اقول لبابا انك كنت بتضايقني في فرح غاده

ضحك رامي : يابنتي هو انا بعمل حاجه غلط دلوقتي؟ انا جاي وعايز اتجوزك

لمياء بدهشه : يعني انت جاي بجد ولا بتكمل التمثيليه البايخه

رامي بجديه : فاكره لما شفتك قدام اوضة غاده وشريف كان جوا .. سمعتك وانتي بتدعيلهم .. قلت اكيد انتي صاحبة غاده .. ولما احرجتك ومشيتي زعلانه .. رحت وراكي وسألت عنك وعرفت انك لا مخطوبه ولا متجوزه .. وجبت عنوانك .. وقولت اكيدد هتكوني موجوده في كتب كتاب شريف .. وفعلا اللي حسبته لقيته .. وبصراحه عجبني صدك ليا .. احترمتك اوي .. ولو عرفتيني كويس هتعرفي اني مابغلسش على حد الا لما يكون حد عزيز عليا

لمياء بدهشه : عزيز عليك ازاي ؟

رامي : ازاي دي خليها بعدين .. بس انا مش جاي اهزر ولا العب .. انا سألت عليكي كويس وعلى اهلك واتمنى انك توافقي … وساعتها هتعرفي الهزار من الجد

شعرت لمياء بأنه يتكلم بجديه .. وشعرت ايضا بانا استطاع ان يجذبها اليه ..

هنا دخل والدها مره اخرى .. ورحب برامي .. وبعد قليل انصرف رامي وقال لوالدها انه ينتظر الرد .. وبعد يومين جاءه الرد بالموافقه ..

جاء يوم زفاف جيهان وهاني .. اعد لها فرحا اسطوريا .. لم تكن تريد ذلك فهي ليست صغيره ولا بكر .. كان رده عليها هكذا : انتي في نظرة ست البنات كلهم .. وبالنسبالي كأنك بنت بنوت ولازم يتعملك احسن فرح ..

حضرت غاده بفستان انيق ودخلت القاعه متأبطه ذراع شريف .. جلست معه ومع والدته .. اقترب منها وقال : غاده .. انتي حطه مكياج ليه؟

غاده بارتباك : ده عشان الفرح بس وكده؟

شريف بصرامه : انا فوتلك يوم كتب كتابنا عشان عروسه .. انما اللي بيحصل ده مايتكررش تاني .. انتي حلوه من غير حاجه .. المكياج ده مايتحطش غير ليا في بتنا بس ..

ثم بدا اكثر صرامه وهو يقول : فاهماني

غاده بسعاده : فاهمه ياحبيب قلبي .. انا اسفه ومش هيتكرر .. اوعدك

شريف : طيب خليكي قاعده اوعي تقومي من مكانك .. انتي عايزه حد يخطفك مني وانتي حلوه اوي كده

غاده بضحك : ماشي ياعم .. شكرا على المجامله

شريف بحب : ربنا يعلم انها مش مجامله .. انتي عندي احلى واحده في العالم ..

ثم مسك يدها وقبلها وقال : ربنا يخليكي ليا يافرحة عمري كله