رواية شارع الحب
حقيقة الأمر محدش رن عليكي لحد الآن
إبتسمت أتعودت إنهم مش بيسألوا عليا ولا بيحسوا بإختفائي أصلا بس تخيلت إن الوقت اتأخر ممكن يرنوا يطمنوا بس شكل الفرح اللي بيحضروه أهم مني مسكت الموبايل ورنيت على ماما وقالتلي لسه قدامهم كتير يمكن يوصلوا على الساعه واحده بعد منتصف الليل اه عادي مش مهم أقعد وحدي كل ده مهي معاها بابا وأختي معاها خطيبها والاتنين في فرح واحد بصيت بحزن لقيت عيون العجوز حور متتبعيني
انا بس محتاجة أشرب بعد إذنك
الجد محب
انا عملت ليكي شاي بلبن يدفيكي شوية ساندوتشات صغيرة أتمنى متكسفنيش
كنت جعانة جدا فعلا أخدت الساندوتش وإبتديت أكل بعدها حسيت بلأحراج من طريقة أكلي فإعتذرت
انا اسفة انا عندي إضطراب في الأكل ووو
قاطعني جدو محب
كلي براحتك انا وحور هنطلع
لاء خليكم معايا معلش
انا قصدي نسيبك على راحتك
لا ء لاء خليكم
كانت عيون الجدة حور اللي بلون البحر كلهم تساؤلات واقفة في صمت شديد
هو المكان اللي إحنا فيه ده فين
شارع الحب
ايوه فينه بالنسبة للقاهرة يعني مايبعد كام يعني
ما بينا وبين القاهرة ٥٠ كيلو تقريبا
ايه خمسين كيلو!
ايوه يابنتى مالك
ماليش إنا عايزة أروح حالا للقاهرة
دخل شاب غريب البيت لبسه غريب ومش مرتب دقنه طويلة ومش مهندمة و لابس نضاره بس ملامحه زي أهل البيت برضو كلها طيبة كان طويل القامة
خير ياجدو جايبني متكربج كدا ليه
قولتلك ستين مرة ياولد بلاش الألفاظ دي أنت دكتور محترم أكشف يلا
أكشف على ايه
على البنت الجميلة دي
بص عليا ودقق في ملامحي وإتكلم
هي جميلة فعلا
ايه يا ولد اللي بتقوله ده
ياجدو انا قولت لك مليون مرة انا مينفعش أكشف على
ششششش مش عايز أسمع صوتك شوف شغلك البنت أغمى عليها وبص عيونها دبلانين إزاي
اووف حاضر جهاز الضغط ياتيتا وهاتي الشنطة من على السفره بره
دخلت تيتا حور ومعاها شنطه سوداء مسكها الشاب وقرب مني
بعد إذنك يا أنسة ممكن دراعك أقيس الضغط
إتكلمت پخوف وانا بمد دراعي
إ إ إتفضل
اه ضغطها واطي جدا ياجدو كدا محتاجين نركب لها كانيولا علشان محلول الملح
لا لا انا بخاف من الإبر عموما أروح أركب كانيولا دا مستحيل
متخفيش إيدي خفيفة خالص
فتح حقيبته كان كلها أدوات غريبه
تيتا مفيش هنا كانيولا هاتي الكيس بتاع أدوية جدو فيه كانيولا ومحلول ملح على الرغم ان كنت حاطط كانيولا أول إمبارح في الشنطة دي لجدو والله
هو هو حضرتك دكتور ايه!! الأدوات اللي اللي في الشنطه شكلها غريب شوية
مسك ايدي بلطف وحاول يتسخرج عرق وإتكلم بفخر
انا دكتور أمير صلاح إبراهيم دكتور شرعي
بصيت پصدمه وصړخت
دكتور ميتين!! أنا عايزه أمشي حالا ياجدو محب جدو محب
أما إنك قليلة الأ بصحيح أنا دكتور ميتين ياجثة إنتي
انت قليل الذوق تفهم إيه انت في الكانيولا والضغط وماسك إيدي بكل تكبر وفشخرة ولا كأنك دكتور مجدي يعقوب سيب إيدي
قال يعني إيد الأميرة ليونور يا أخي
مين!
اه ما حد شكلك أكيد جاهل وميعرفش مين دي
دخل الجد والجدة لفض الإشتباك وتدخل مسرعا الجد وتحدث
ايه يابنتي حصل ايه لكل ده تصدقي انا معرفش لحد دلوقت إسمك إيه
بصيت لجدو محب براحة وجريت عليه وكأني بتحامى فيه وإتكلمت بصوت يعانق الخۏف
إسمي بتول بتول القاضي خريجة كلية أداب القاهرة من سنة مش جاهلة زي ما بيقول الحانوتي ده
نظر ليا الجد وصوت قهقهته عالية
أمير پغضب
عجبتك أوي كلمة حانوتي يا أسطا محب ولا ايه
جد محب
والله انت سوقي وماتنفع حتى تكون حانوتي علشان دي مهنة محترمة متنفعش لأمثالك
أمير وهو يخرج من باب الغرفة
عموما ياجدو ضغطها واطي ومحتاجة محلول ملح في صيدلية أول الشارع خليها تروح يركبولها كانيولا علشان انا بتاع ميتين بعد أذنك
نظرت إلي الجد وعيوني كلها أسف ثم تحدثت
انا أسفة ياجدو محب والله هو اللي أبتدى وانا بس إتخضيت لما عرفت أنه دكتور ميتين
متقوليش ميتين دي ألا هو بيعتز بالتخصص بتاعه أوي متقلقيش حور هتروح وراه وبعدين هو هيروح فين دي أوضته جنب أوضتك هنا
هو حفيدك ولا زي ماانا بقولك ياجدو كدا!
هو زي حفيدي لكنه مش حفيدي بس انا مربيه يعني خدي بالك دا واد زي الفل قصته طويلة كدا تعرفي إنكم شبه بعض كل واحد فيكم عيونه فيها قصة وحياته متلغبطة ومتخبطة
وايه قصته
ااه شكلك فضولية خالص
إبتسمت وأومأت برأسي ثم أمسك يدي وأشار لي بالجلوس
الجايات كتير كل اللي عايزك تعرفيه حاليا أن الواد أمير ده دكتور شاطر وجايب لي جهاز الضغط علشان انا علطول ضغطي واطي كدا بيظبطهولي ولو محتاج أي إسعافات بيقوم بيها بصي إحنا معتبرينه طبيب بشړي عادي بيفهم في كله دا حتى لما بنتزنق ومنلقيش دكتور بيطري في الحته بنجيبه
ضحكت على كلامه وطريقته وهو أكمل حديثه
المهم تاخدي محلول الملح وانا هنادي عليه وبعدها شويه شاي يدفوكي كدا وأعرف قصتك إنتي ايه وايه اللي جابك شارع الحب وقعدتي فيه قعدتك اللي كلها حزن!
اللي جابني شارع الحب هو الحب
دخل أمير مقاطعني وكله عصبيه ومن خلفه الجدة حور موجها لي حديثه
والله والله والله لولا إن تيتا حور الست الشقرا القمر دي تدخلت والله ما كنت هعبرك علشان إنتي لا تطاقي
الجد محب
أمير كفاية كدا هي دي تربيتي!
طأطأ رأسه خجلا ثم تحدث
أنا أسف ياجدو
الجد محب
المفروض تتأسف ليها هي مش ليا أنا أتفضل أتأسف لأنسة بتول
أمير
أهو دا اللي مش هيحصل أبدا ياجدو دي غلطت فيا وانا مش هقدر أعمل ده علشان
قاطعته في الكلام وبصيت له بإبتسامه خفيفة وإتكلمت
بس انا أقدر أعمل ده أنا أسفة يادكتور أمير على كلمة دكتور ميتين وحانوتي وإني هنت تخصصك وكمان المفروض عليك إنك تتأسفلي على كلمة جاهلة ولا تطاقي وچثة
أمير بتغصب
ولا يهمك حصل خير انا اسف ليكي
ولا يهمك انت كمان حصل خير
الجد محب
يلا يا أمير ركب ليها الكانيولا
بعد مرور ربع ساعة كنت حكيت كل حاجة حصلت معايا لجدو محب وكانت تيتا حور في الوقت ده بتحضر العشا لأمير أما بالنسبة لأمير فبعد ما ركب الكانيولا دخل أوضته مطلعش منها
عرفت ياجدو حكايتي
عرفت يابنتي كان الله في العون طب وناوية على ايه
اديت كريم مهلة والمفروض على قراره أنوي
بتحبيه
بحبه
ليه مش حاسس إنك بتقوليها بصدق وكأنك مهزوزة
علشان انا مهزوزة فعلا ياجدو الموقف دا إتكرر أربع مرات كل ما يتقدم حد يقول الجملتين دول ولازم نسيب بعض ونمشي
ومنكملش بس هو بيحبني
متأكده من حبه ليكي
أقولك ولا تضحكش عليا
قولي
انا مبقتش متأكدة من حاجة خلاص حتى أهلي مبقتش واثقه ومتأكده من حبهم فيا انت عارف إني لولا
رنيت عليهم هما مكنوش هيسألوا
علشان واثقين إنك في البيت مثلا
لا خالص ماما عارفة إني مش في البيت هما أصلا يعرفوا بعلاقتي بكريم مؤخرا حكيت ليهم كل حاجه بس هما فاكرين إني بقول كدا علشان أرفض وإن مفيش حد
معقول!! ليه ميصدقوش إن في حد على الرغم من إنك حكيتي ليهم
علشان انا في نظرهم عيله ساذجة بغير من أختي الكبيره طول الوقت في الوقت اللي قالت أختي إنها بتحب حد اللي هو شادي اللي حكيتلك عنه وإنه جاي يتقدملها أتشجعت انا كمان بعد خطوبتها أحكي وأكون شجاعة زيها وجريئة بس هما مصدقونيش فكروا إني بعمل كدا للفت الإنتباه
علشان ايه تلفتي إنتباهم
ضحكت وإتكلمت بمرارة
علشان أختي زارعة فيهم إني بغير منها طول الوقت وبقلدها ودا مش حقيقي
انتي ضحېة بيت فاشل في التعامل النفسي
انا مش ضحېة ولا بحب أعيش في الدور ده ولا بحب حد يقول لي كده انا سوية انا بس حكيت معاك علشان حسيت براحة براحة غريبة من أول ماشوفتك ومن وقت ماجيت البيت ده
أنا أسف لو ضايقتك حقك عليا
مسك إيدي وربت عليها وضحك جامد
بتضحك على ايه ياجدو!
مش قولتلك إنتي وأمير شبه بعض وكل واحد في عيونه حكاية انتوا كمان وجعكم شبه بعض
مهتمش المره دي أعرف ولا يكون عندي فضول أسأله عن حكايته كل اللي كنت بفكر فيه كريم وازاي اروح من هنا
جدو هو انا ممكن أطلب منك أخر طلب انا عارفة إني عذبتك معايا خالص
ست البنات تطلب وجدو محب ينفذ
انا عايزة أروح الفكره إني مش عارفة انا جيت إزاي كل اللي فكراه إني ركبت عربيه وبعدها نزلت أتمشيت كتير لحد ما لقيت الشارع ده هادي قعدت فيه
متقلقيش أمير بيجيب عربية صاحبه وهيوصلك
أمير تاني
والله عيل جدع بس متجيبش في خڼاقه
دخلت تيتا حور وبصت ليا وعيونها كلها دموع
الجد محب
ياحور ياحور كدا هتخضي البنت أحنا أتفقنا على ايه
فجأه بلا أي مقدمات قربت مني تيتا حور وعانقتني بشدة وأجشهشت بالبكاء
جدو هو في ايه مالها تيتا حور!
مسك الجد زوجته حور وضمھا إليه ثم تحدث بتوتر
هي حور عاطفية شوية
انا حبيتكم أوي اه صحيح أتفضلي ياتيتا حور الشال
نظرت لي ودموعها تسقي وجنتيها وتحدثت بصوت مبحوح
ليه سبيه يدفيكي وبعدين ما انتي بتحبيه لسه هتسبيه ولا إنتي كل حاجه بتحبيها بتسبيها
بحبه!! انا مش فاهمه حاجة
الجد بعصبية
حور!!
احم أمير بيرن يعني المفروض هننزل دلوقت علشان تركبي معاه ويوصلك دا رقمي وعنواني كتبتهم في الورقة دي علشان لو احتاجتي أي حاجة كلميني وتعالي لينا
شكرتهم على حسن ضيافتهم ليا ومازالت مستمرة أفكر في كلام وتصرفات تيتا حور لحد ما قطع الصمت أمير
أداب قسم ايه
هاا!!
اااه إنتي سرحانة كنت فاكرك زعلانه علشان كدا متكلمتيش
لا مش زعلانة وبعدين هتكلم معاك في ايه
انا أسف
لا مش كدا بس حقيقي انا هتكلم أقول إيه
قولي لي انت أداب قسم إيه
قسم فرنش
انا سمعت إنه إتلغي من المدارس
هو مش بالظبط كدا بس يعتبر اه
ربنا يعوضك على فكرة اللغة حلوة عموما و شيء لطيف ممكن تستغليه في حاجات كتير وممكن تشتغلي في مجالك مش شرط تدريس
وقتها افتكرت كلام كريم وهو بيقولي خلاص كدا كدا كنت عايزك تقعدي في البيت البنت ملهاش غير بيت جوزها في النهاية
أشتغل!!
أيوة طبعا لازم تكوني مستقلة بذاتك أنسي كوميكات الفيس بتاعت احلامنا ضاعت هي كانت ضربه قوية بس الشاطر اللي يستغلها ويفكر لمده سبع سنين مثلا لقدام ومش أي حد بيفكر لقدام
بمعنى ايه!
بمعنى إن اللغة دي هتقل جدا في مصر وبعد شويه هنبقي محتاجين ناس كتير تعلم اللغة دي لإننا بقرار ممكن ترجع محدش عارف او لأجل ظروف كتير واللغة دي هتكون أقليه اللي محافظ عليها ومستخدمها
حسيت أنه ذكي طريقة كلامه لطيفة أبتسمت إبتسامه خفيفة وفضلت الصمت وهو كمان إلتزم الصمت لوقت وصولي البيت
بس هنا دا بيتي
حمدلله على السلامه يا أنسة
بتول بتول القاضي الله يسلمك ممتنة ليك يادكتور تعبتك معايا وتعبت الجماعة أشكرهم لي بالنيابة عني للمرة التانية كلمة شكر مش هتوفي حقك
متقوليش كدا يا انسة بتول مفيش شكر دا رقمي لو احتاجتي أي حاجة كلميني أكيد من غير اي تردد
أخدت الرقم ودخلت باب العماره الساعة الواحده والنصف كنت مړعوپة لحد من الجيران يشوفني وقتها هيقولوا ايه!! دخلت شقتنا بهدوء شديد لحد ما أكتشفت إنهم لسه موصلوش شكرت ربنا وغيرت هدومي بسرعة ونمت كنت أول مره أنام بالراحة دي من إسبوع فات
اليوم التالي وبألاخص الساعة السادسة مساء
أول ما شوفت الساعة حسيت بغصه شديدة في قلبي وأول ما شوفت إسم كريم بيرن زادت الغصة ومكنتش عارفة سببها فتحت ورديت
عاملة ايه يابتول
مش عارفة بس الأكيد إني تايهه
عرفتي ترجعي وحدك إمبارح
علشان كدا انت رنيت تطمن عليا
انتي اللي طلبتي مني منتعاملش كأحباب
بس حتى مسج أي حاجة انت عارفني بغرق في شبر ميه
انا اصل يعني
ولايهمك انا عايزه أعرف قرارك
قراري هو
كنت حاسة في طريقته إنه قرر نبعد بس كنت بحاول أكذب إحساسي كنت بقول بلاش ظلم دا بيحبك لحد ما سمعت جملة غريبة تافهه بنقولها لما نحس إننا وصلنا أخر المطاف
خلينا أصحاب يا بتول انا مش هكونلك الزوج اللي انت حباه ولا إنتي كمان هتكوني لي الزوجة اللي محتاجها أحنا من النهاردة مش مع بعض كفاية سنتين
ضحكت ضحك هستيري وقفلت المكالمة وانا مش حاسة غير بمشاعري وقلبي بيتهشموا لحد ما دخلت ماما الأوضة وأتكلمت
بتول حبيبي عريسك جه
عريسي!!
ايوه عريسك وائل أخو شادي بره هو وأمه وابوه ويالهوووي يابتول على كمية الهدايا اللي داخلين بيهم علشان تعرفي لما أمك تدعيلك جوازه إنما إيه متقلش حاجة عن أختك ريم ووائل ايه بسم الله ماشاء الله أغنى من شادي بكتير يلا إغسلي وشك كدا وشوية ميك اب على دريس لطيف وأطلعي
إنتوا إزاي تدوهم ميعاد من غير ما ترجعولي
يووه يابتول ما إحنا جينا ياحبيبتي من الفرح لقيناكي نايمة
والنهاردة اليوم كله دا ايه!
مكنتش فاضية إديكي شوفتي بعينك اليوم كله أنا وأختك عملنا ايه في البيت
ماما ماما انا مش قادرة أتكلم ولا حمل مناهدة انا مش مؤهلة أطلع أتعرف على حد
تتعرفي!!
ايوه طالما محترمتونيش ومشاركتونيش الموضوع اللي هو من الأساس يخصني
لا دي خطوبة مش
تعارف النهاردة خطوبتك
ايه الهزار البايخ ده!
بنت إحترمي نفسك
أحترم نفسي! واحترم نفسي إزاي وانا مش عارفه معني الأحترام بسبب إسلوبكم يعني ايه خطوبتي!! فهميني يعني ايه أحنا لو في عصر الجاهلية كانوا هياخدوا رأيي
دخل بابا على صړاخي وتحدث
